Turizmi nxit punësimin e të rinjve në Gjirokastër

Rritja e numrit të vizitorëve në Gjirokastër përgjatë këtij sezoni turistik po nxit interesimin e të rinjve për t’u punësuar në sektorin e turizmit. Prej disa javësh e reja Vanesa Dine është punësuar si operatore turistike duke orientuar turistët vendas dhe të huaj, të cilët dëshirojnë të vizitojnë vlerat historike dhe muzeale të qytetit të gurtë.

“Mendoj që është e rëndësishme t’i japim përparësi turizmit në qytetin tonë. Gjirokastra është një qytet që ofron shumë atraksione për turistët në shumë fusha në atë historike, turizmin natyror”, thotë ajo.

Për Vanesën, megjithëse një ditë pune është e ngarkuar në përgjigje të interesimit të turistëve sërish ajo kontribuon për promovimin e vlerave të Gjirokastrës

“Zakonisht në mëngjes është pak më qetë, më pas fillon fluksi i lëvizjes kryesisht në orët e paradites dhe drekës turistët vijnë dhe më së shumti pyesin për drejtimet në të cilat duhet të shkojnë për të vizituar, shtëpitë muze ose kalanë, çfarë mund të ofrojë qyteti”, tregon e reja.

Interesimi i vizitorëve nga e gjithë bota është i lartë për të vizituar vlerat turistike si dhe monumentet e kulturës në Gjirokastër dhe rrethina

“Ka pasur grupe nga vende të ndryshme kryesisht nga Europa, ka pasur grupe franceze, italiane, spanjolle, gjithashtu edhe nga kontinentet e tjera, kanë ardhur nga vendet aziatike, edhe nga Australia ose Zelanda e Re”, shprehet ajo.

Tashmë janë të shumtë të rinjtë gjirokastritë të cilët e shikojnë turizmin si mundësi punësimi dhe përfitimi të të ardhurave ekonomike.

LEXONI GJITHASHTU:

• Era e fortë thyen pemët në Gjirokastër (FOTOT)
• Plagosi me thikë dy persona, arrestohet 45-vjeçari në Gjirokastër