Turqia e gatshme të organizojë samit midis Ukrainës dhe Rusisë që lufta të ndalet

Presidenti i Turqisë, Recep Tayyip Erdogan, ka thënë të premten se vendi i tij është i gatshëm të jetë nikoqir i bisedimeve për paqe mes Moskës dhe Kievit, dhe se do të “kontribuojë fuqishëm” për rindërtimin e Ukrainës pas luftës.

Ai i bëri këto komente gjatë një konference të përbashkët me presidentin ukrainas, Volodymyr Zelensky, në Stamboll.

“Lufta mes Ukrainës dhe Rusisë duhet të përfundojë patjetër përmes bisedimeve. Ne jemi të gatshëm ta organizojmë një samit të paqes, ku edhe Rusia është e pranishme”, tha Erdogan.

“Derisa ne e vazhdojmë solidaritetin me Ukrainën, ne do ta vazhdojmë punën tonë për t’i dhënë fund luftës një paqe të drejtë përmes bisedimeve”, shtoi ai.

Zelensky, megjithatë, tha se Moska nuk do të ftohet në një samit të rëndësishëm të paqes, të cilin Zvicra ka shprehur gatishmëri ta organizojë këtë pranverë.

Por, ai shtoi se një përfaqësues rus mund të ftohet në një takim pasues, pasi të jetë arritur një marrëveshje për udhëzuesin për paqen me aleatët e Kievit.

Me gjithë vdekjet dhe dëmet e pësuara gjatë luftës, mbajtja e një konference për paqe së shpejti – ku të dyja palët do të merrnin pjesë – duket e pamundur.

Kërkesat e Ukrainës për paqe janë që Rusia t’i tërheqë të gjitha trupat e veta nga Ukraina, t’i kthejë kufijtë e vet nga epoka pas rënies së Bashkimit Sovjetik më 1991, dhe Rusia të mbahet përgjegjëse për veprimet e saj.

Kremlini s’i ka pranuar këto kushte.

LEXONI GJITHASHTU:

• “Kjo është finalja ime”, Erdogan thotë se zgjedhjet e marsit janë të fundit për të
• Samiti për Ukrainën në Tiranë, kur vjen Zelensky. Erdogan video-mesazh online