“U rrezikua stani i një bariu”, reshjet shkaktojnë probleme në Gjirokastër

Reshjet intensive të shiut që kanë përfshirë zonën e Gjirokastrës gjatë dy ditëve të fundit kanë shkaktuar probleme për banorët.

Si pasojë e rrëshkitjeve të tokës, janë dëmtuar disa segmente rrugore në fshatrat malorë të Bashkisë Gjirokastër, ndërkohë që po punohet për rikthimin e qarkullimit të automjeteve në këto zona.

“Kemi patur në Njësinë Administrative Antigone një rrëshkitje dheu mbi rrugë, ku ndërhyri bashkia dhe rruga u pastrua dhe u bë e kalueshme. Në të njëjtën kohë, një përrua doli nga shtrati dhe bllokoi rrugën, por edhe aty ndërhyri emergjenca për ta bërë rrugën të kalueshme. Për shkak të reshjeve u rrezikua edhe stani i një bariu në zonën e Pllakallisë, sepse u çar argjinatura e lumit dhe uji përmbyti stanin. U morën masat për të mbyllur argjinaturën dhe stanit iu shpëtua. Po ashtu, në Njësinë Administrative Lazarat, përrua i Sopotit doli nga shtrati dhe bllokoi një rrugë”, tha Ilir Çumaku, Drejtor i Emergjencave pranë Bashkisë Gjirokastër.

Shqetësim në ditët me reshje shiu mbetet ndotja e përrenjëve malorë, e cila rrit rrezikun e përmbytjeve nga vërshimi i ujërave.

“Para fillimit të shirave, kemi bërë kontroll në të gjithë shtretërit e përrenjëve dhe kemi lënë detyrat për strukturat përkatëse. Në përroin e Ficos u ndërhy duke hequr një sasi dherash, gjë që pati ndikim pozitiv. Problemet aty u krijuan nga plehrat që qytetarët hedhin, duke bllokuar zgarat dhe duke rrezikuar daljen e ujit në rrugë, por intervenimi ynë e zgjidhi situatën. Përrenj të tjerë janë në parametra gati optimalë”, shtoi ai.

Gjatë ditës së sotme reshjet kanë pësuar një ulje intensiteti, megjithatë mbeten problematike rritja e prurjeve të lumit Drino dhe shkarkimet e tij në basenin e Vjosës.

LEXONI GJITHASHTU:

• Prurjet në lumin Vjosë arrijnë nivelin maksimal, rrezikohen zonat bujqësore
• Prurjet e lumit Vjosa në pikë kritike, banorët: I lutemi Zotit të mos ketë përmbytje