Ukraina dhe Rusia nisin raundin e dytë të bisedimeve në Abu Dhabi

Negociatorët ukrainas dhe rusë kanë filluar një raund të dytë bisedimesh të ndërmjetësuara nga Shtetet e Bashkuara në Emiratet e Bashkuara Arabe (EBA), ndërsa kërkojnë të përparojnë negociatat e tensionuara se si t’i jepet fund luftës gati katërvjeçare të Rusisë në Ukrainë.

Delegacionet ruse dhe ukrainase mbërritën në Abu Dhabi të mërkurën në mëngjes, sipas mediave shtetërore ruse dhe një zëdhënësi të kryenegociatorit ukrainas. Mbetet e paqartë se kur do të mbërrijë delegacioni amerikan.

“Një raund tjetër negociatash ka filluar në Abu Dhabi”, shkroi në mediat sociale Rustem Umerov, kreu i delegacionit ukrainas, duke shtuar se ekipi i Kievit po kërkonte “të arrinte një paqe të drejtë dhe të qëndrueshme”.

Bisedimet dy-ditore trepalëshe në Abu Dhabi vijnë ndërsa Presidenti ukrainas Volodymyr Zelensky akuzoi Rusinë për shkelje të një marrëveshjeje të ndërmjetësuar nga Presidenti i SHBA-së Donald Trump, e cila bënte thirrje për ndërprerjen e sulmeve ndaj objekteve energjetike.

Një breshëri e madhe raketash dhe dronësh rus, në prag të bisedimeve, goditi rrjetin energjitik të Ukrainës, duke ndërprerë energjinë elektrike dhe ngrohjen në temperatura shumë nën zero dhe kërcënoi të errësonte çdo shans për përparim në kryeqytetin e Emirateve të Bashkuara Arabe.

“Çdo sulm i tillë rus konfirmon se qëndrimet në Moskë nuk kanë ndryshuar. Ata vazhdojnë të vënë bast për luftën dhe shkatërrimin e Ukrainës dhe nuk e marrin seriozisht diplomacinë”, tha Zelensky të martën.

“Puna e ekipit tonë negociator do të përshtatet në përputhje me rrethanat. Shumë ukrainas këtu shpresojnë se do të ketë një tjetër pauzë në sulmet që synojnë infrastrukturën energjetike” pas takimit të dytë në Abu Dhabi, tha Audrey MacAlpine, duke raportuar nga Kievi.