Ukraina i kërkon Hungarisë dhe Sllovakisë dialog pas kërcënimeve për energjinë

Ministria e Jashtme e Ukrainës u ka bërë thirrje Hungarisë dhe Sllovakisë të angazhohen në dialog konstruktiv, pas paralajmërimeve se do të ndërpresin furnizimin me energji elektrike për Ukrainën nëse nuk rifillon tranziti i naftës ruse përmes tubacionit Druzhba.

“U bëjmë thirrje qeverive të Hungarisë dhe Sllovakisë për bashkëpunim konstruktiv dhe sjellje të përgjegjshme”, thuhet në deklaratën e publikuar në kanalin zyrtar në Telegram. Ministria i cilësoi paralajmërimet si “ultimatume dhe shantazh”, duke shtuar se veprime të tilla janë provokuese, të papërgjegjshme dhe kërcënojnë sigurinë energjetike të gjithë rajonit.

Furnizimet me naftë ruse për Hungarinë përmes tubacionit Druzhba, që kalon në territorin ukrainas, u pezulluan në fund të janarit. Budapesti këmbëngul se Kievi po bllokon tranzitin për arsye politike. Në reagim ndaj ndërprerjes, Hungaria ka ndalur furnizimet me naftë për Ukrainën, ka bllokuar një kredi prej 90 miliardë eurosh të Bashkimi Evropian dhe ka paralajmëruar ndërprerjen e energjisë elektrike për Kievin.