Ukraina ofron partneritet për ndërtimin e një sistemi mbrojtës anti-dron në Evropë

Presidenti i Ukrainës, Volodymyr Zelensky, ka propozuar krijimin e një mburoje të përbashkët ajrore me Poloninë dhe partnerët evropianë, bazuar në përvojën ushtarake të Ukrainës në përballjen me sulmet me dronë dhe raketa nga Rusia.

Kjo deklaratë u bë në një forum sigurie në Varshavë, vetëm një ditë para takimeve të liderëve të Bashkimit Evropian në Danimarkë për të diskutuar mbi mbrojtjen evropiane.

“Po i ofrojmë Polonisë dhe të gjithë partnerëve tanë të ndërtojmë një mburojë të përbashkët dhe vërtet të besueshme kundër kërcënimeve ajrore ruse,” tha Zelensky. Ai shtoi se ushtria ukrainase tashmë ka aftësinë “t’i kundërvihet të gjitha llojeve të dronëve dhe raketave ruse”.

Që nga fillimi i pushtimit të plotë në vitin 2022, Rusia ka përdorur me intensitet në rritje dronë kundër Ukrainës, duke kryer sulme të dendura dhe masive me dhjetëra apo qindra UAV në të njëjtën kohë.

Zelensky ka paralajmëruar më herët se Moska synon të rrisë sulmet me dronë deri në 1,000 në ditë. “Por ne do t’i kapim të gjitha,” deklaroi ai.

Sipas tij, Ukraina është tani në gjendje të rrëzojë rreth 90% të dronëve rusë, edhe në ditët me sulme të koordinuara në shkallë të gjerë.

Një shembull është data 7 shtator, kur Rusia lëshoi 810 dronë të tipit Shahed në sulmin më të madh ajror ndaj Ukrainës.

“Përvoja e Ukrainës është më e rëndësishmja në Evropë sot,” theksoi Zelensky, duke shtuar se ekspertiza, teknologjia dhe specialistët ukrainas mund të bëhen një element kyç i projektit evropian për një “mur me dronë” – një sistem i koordinuar për të garantuar sigurinë në hapësirën ajrore të kontinentit.

Një grup specialistësh ushtarakë nga Ukraina ndodhet aktualisht në Danimarkë, ku po ndajnë përvojën e tyre në mbrojtjen nga sulmet me dronë.

“Grupi ynë ka filluar të vendosë një mision në Danimarkë,” konfirmoi Zelensky në një postim në platformën X.

Stërvitja e quajtur “Krahët e Mbrojtjes” bashkon forcat ukrainase dhe daneze për të praktikuar kundërmasat ndaj mjeteve ajrore pa pilot.

Kjo stërvitje vjen pas disa incidenteve me dronë që detyruan mbylljen e përkohshme të aeroporteve daneze, duke ngritur shqetësime serioze për sigurinë ajrore të vendit.

Edhe Polonia ka kërkuar ndihmë nga Ukraina, pas disa rasteve ku dronët rusë kanë hyrë në hapësirën e saj ajrore.

Zelensky theksoi se rezultatet e misionit në Danimarkë do të shërbejnë si bazë për bashkëpunim më të gjerë me vende të tjera evropiane, në kuadër të një përpjekjeje të përbashkët për të forcuar mbrojtjen nga kërcënimet ajrore të natyrës hibride.

LEXONI GJITHASHTU:

• BE-ja planifikon “murin me dronë” për të mbrojtur kufirin lindor të NATO-s
• Kryeministrja daneze: Kemi mandat për të rrëzuar çdo dron që shkel hapësirën tonë