Ukrainasit avancojnë drejt Bakhmutit, çlirohet fshati strategjik pranë tij

Forcat ukrainase kanë deklaruar se kanë çliruar një tjetër fshat në afërsi të Bakhmutit, ku kanë ngritur flamurin ukrainas. Ekspertët insistojnë se fshati Klishçivka, në jug-perëndim të qytetit strategjik mund t’u ofrojë trupave vendase pozicione më të mira për të rimarrë nën kontroll territorin përreth, pas muajsh të tërë luftimesh të ashpra. Një ditë më parë, flamuri ukrainas u ngrit edhe në Andriivka.

“Sa i takon Andriivkës, ky territor tani është një zonë gri. Nuk ka asnjë shans që kundërshtarët të shkelin atje pasi fshati është shkatërruar tërësisht. As njësitë tona nuk kanë mundësi të shkelin atje, pasi vdekja është aty dhe ne nuk kemi ndërmend të hyjmë atje vetëm për t’i rënë në sy shtypit”, deklaroi Denis Pushilin, guvernator i Republikës së Vetëshpallur të Donjeckut.

Nga ana tjetër, presidenti Volodymyr Zelensky uroi trupat e tij për sigurimin e një tjetër fitoreje, e cila u konfirmua edhe nga komandanti i forcave në terren Oleksandr Syrsky.

Ministria ruse e Mbrojtjes nuk ka bërë ende një koment, por reporterët ushtarakë rusë, në rrjetet sociale kanë mohuar progresin e ukrainasve.

LEXONI GJITHASHTU: 

• BBC: Si piloti rus tentoi të rrëzonte avionin britanik
• Rusia rrëzon dy dronë ukrainas në kufirin me Moskën