Ukrainë, trupat amerikane zbarkojnë në Europën Lindore

Disa mijëra trupa amerikane do t’i dërgohen shteteve anëtare të NATO-s në Europën lindore, në mënyrë që aleatët të ndjehen të mbrojtur për sa i përket gjendjes në Ukrainë. Kjo ka qenë deklarata e administratës Biden, në të cilën theksohet se SHBA nuk do të dërgojë trupa në Ukrainë, edhe në rast konflikti atje si pasojë e kërcënimit rus.

Presidenti Biden ka aprovuar dërgimin e 3,000 trupave të tjerë ditën e sotme në shtete të Europës lindore, të cilët synojnë të qetësojnë situatën dhe të sigurojnë shtetet aleate se SHBA do të jetë aty për ta në çdo rast.

Biden ka theksuar se SHBA nuk ka asnjë qëllim të ndërhyjë në Ukrainë në rast konflikti, por se trupat amerikane janë të detyruara t’i mbrojnë shtetet anëtare në rast konflikti mes vendeve në rajon.

Prej javësh, Rusia po kërcënon një sulm të mundshëm në Ukrainë, edhe pse, presidenti Vladimir Putin nuk e ka pranuar kurrë publikisht diçka të tillë, duke thënë vazhdimisht se ‘Rusia nuk ka asnjë qëllim të pushtojë Ukrainën’.

Sidoqoftë, situata ka përshkallëzuar pasi mbi 100,000 trupa rus gjenden tashmë në kufirin me Ukrainën, dhe pak ditë më parë Pentagoni deklaroi se presidenti Putin ka dërguar mjaftueshëm trupa dhe artileri në Ukrainë për të nisur një pushtim të mundshëm.

Për momentin, 4.000 trupa amerikane kanë zbarkuar në Poloni, rreth 100 të tjerë në Lituani dhe 60 në Letoni dhe Estoni.

LEXONI GJITHASHTU: 

• Zyrtarë të lartë mbështesin hapur Ukrainën
• Pse Gjermania nuk dërgon armatime në Ukrainë?
• Ukraina i kërkon Perëndimit të mos krijojë panik për trupat ruse në kufi