“Unë po e shpëtoj”, Trump: Ukraina do të shkatërrohet shumë shpejt

Presidenti i Shteteve të Bashkuara, Donald Trump, ka deklaruar se Ukraina mund të “shkatërrohet shumë shpejt” përballë “makinerisë së madhe lufte” të Rusisë, të cilën, sipas tij, Kievi nuk mund ta mposhtë.

“Mendoj se po e shpëtoj atë komb. Mendoj se ai komb do të shtypet shumë shpejt. Është një makinë e madhe lufte. Mendoj se po i bëj një shërbim të madh Ukrainës. E besoj këtë”, tha ai.

Ndërkohë, Shtëpia e Bardhë ka sinjalizuar mundësinë e tërheqjes nga negociatat e paqes, me zëvendëspresidentin JD Vance që konfirmoi më 28 prill se janë bërë “përparime”, por pa garanci për një marrëveshje përfundimtare.

Kjo qasje e administratës Trump ka shkaktuar shqetësime te Ukraina dhe aleatët e saj evropianë, të cilët frikësohen se Uashingtoni mund të detyrojë Kievin të pranojë një marrëveshje të pafavorshme paqeje, që mund të përfshijë njohjen e aneksimit të Krimesë nga Rusia dhe lëshime të tjera të rëndësishme.

Megjithatë, situata në terren duket ndryshe nga ajo që përshkruan Trump. Sipas burimeve të gazetës Kyiv Independent, forcat ruse kanë intensifikuar sulmet në vijën e frontit, por këto janë kryesisht përmasa të vogla dhe nuk përbëjnë rrezik të menjëhershëm për kolapsin e mbrojtjes ukrainase.

Ofensiva pranverore e Rusisë, e nisur në fillim të prillit, ka sjellë disa përfitime të kufizuara, por përparimi vendimtar duket ende i paarritshëm.

LEXONI GJITHASHTU:

• Kellogg: Trump kërkon një armëpushim 30-ditor në Ukrainë
• Komandanti i KFOR-it takon shefin e ushtrisë serbe në Beograd