Unioni i Gazetarëve Shqiptarë nderon figurat e medias

Unioni i Gazetarëve Shqiptarë organizoi paraditen e sotme ceremoninë e ndarjes së çmimeve për gazetarët në kuadër të një aktiviteti të përbashkët me VerbumlandiArtAps. Në këtë event morën pjesë një delegacion nga Italia, si dhe përfaqësues nga hapësira shqiptare, duke e kthyer takimin në një moment të rëndësishëm kulturor dhe mediatik.

Në fjalën e tij përshëndetëse, drejtuesi i Unionit, Aleksandër Çipa, theksoi se është kënaqësi të mirëpresë përfaqësuesit e organizatës italiane në këtë takim të përbashkët.

Delegacioni italian u kryesua nga Regina Resta. Gjatë aktivitetit u zhvillua ceremonia e ndarjes së çmimeve dhe vlerësimeve për figura të njohura të gazetarisë, letërsisë dhe kritikës letrare. Mes të vlerësuarve ishin poeti dhe gazetari Xhevahir Spahiu, studiuesi dhe kritiku letrar Behar Gjoka, shkrimtarja Flutura Açka, si dhe Namik Dokle.

Vlerësime morën gjithashtu Engjëll Serjani, profesorja Viola Isufaj, Erion Kristo, Vrion Gaci, Mujë Buçpapaj dhe gazetari Artur Nura, për kontributin e tyre të spikatur në fushat përkatëse.

Një moment i veçantë i aktivitetit ishte prezantimi i vëllimit poetik “Unë mbes fjalë” i autores Regina Resta, i sjellë në gjuhën shqipe nga Angela Kosta, me parathënie nga Aleksandër Çipa.

Aktiviteti u mbyll me mesazhe bashkëpunimi dhe angazhimi për projekte të përbashkëta në të ardhmen, duke e kthyer këtë takim në një urë komunikimi mes kulturave dhe profesionistëve të medias dhe artit.