Uragani ‘Ian’ godet Floridën, priten erëra të forta dhe përmbytje të mëdha

Syri i uraganit Ian ka goditur brigjet e Floridës dhe Shërbimi Kombëtar i Motit ka përsëritur paralajmërimin e tij për erëra ekstremisht të forta, deri në 185 kmh.

Banorëve të zonave të prekura nga Uragani u janë bërë thirrje të vazhdueshme të gjejnë strehim “menjëherë”.

Në një përditësim në  faqen e internetit të Përgatitjes Emergjente dhe Sigurisë Kombëtare të Jacksonville të mërkurën, thuhet se “Rekomandohet që ata që jetojnë në zonat A ose B dhe kanë përjetuar përmbytje gjatë stuhive të mëparshme të konsiderojnë evakuimin”.

Disa shkolla dhe universitete janë mbyllur gjatë gjithë javës, si dhe zyrat e qytetit dhe degët e bibliotekave, thuhet në deklaratë.

Të martën, kryetari i bashkisë së Jacksonville, Lenny Curry, lëshoi ​​një gjendje të jashtëzakonshme për qytetin, e cila hyri në fuqi të mërkurën në orën 12:00 me orën lokale.

Jacksonville është në cepin verilindor të Floridës.

LEXONI GJITHASHTU:

• 8 viktima nga uragani Fiona në Porto Riko
• 65 të vdekur nga uragani ‘Ida’ në SHBA, ende probleme në disa shtete