Vance: Witkoff dhe Kushner janë në Zvicër për bisedime me Iranin, gjërat po shkojnë mirë

Zëvendëspresidenti amerikan, JD Vance konfirmoi këtë të shtunë se bisedimet SHBA-Iran janë duke u zhvilluar në Zvicër dhe se ai do të udhëtojë atje në ditët në vijim, pasi anuloi udhëtimin e tij të planifikuar për të enjten në mbrëmje.

“Pres që do të largohem diku brenda dy ditëve të ardhshme, por e dini që është gjithmonë një valle koordinimi delikate dhe protokollet diplomatike”, tha Vance në një intervistë në Fox News.

“Duhet të jem i sinqertë me ju, nuk i kuptoj vërtet këto gjëra. Nuk kam qenë kurrë veçanërisht i dhënë pas protokolleve diplomatike”, shtoi ai.

Zëvendëspresidenti konfirmoi gjithashtu se dhëndri i Trump, Jared Kushner, dhe i dërguari special i SHBA-së në Lindjen e Mesme, Steve Witkoff, janë në Zvicër për bisedime.

“Pra, ne do t’i planifikojmë bisedimet kur të mbërrijnë drejtuesit e qeverisë iraniane, si dhe të qeverisë së Katarit dhe Pakistanit. Kjo mund të ndodhë që nesër, por këto gjëra janë gjithmonë paksa të paqëndrueshme”, tha Vance.

“Jared dhe Steve kanë qenë në terren për disa orë duke u marrë me disa nga elementët teknikë të këtyre negociatave… Nga sa kam kuptuar unë, duke folur me Jared dhe Steve këtë mëngjes, gjërat po shkojnë mirë”, shtoi ai.