Varianti Delta qarkullon në Shqipëri prej gati 2 muajsh, konfirmon zv.ministrja e Shëndetësisë

Zv. Ministrja e Shëndetësisë, Eugena Tomini thotë se prania e variantit “Delta” të COVID-19 në Shqipëria është hasur në fund të muajit maj.

Personat e prekur nga mutacioni i coronavirus tha Tomini, kanë krijuar vatra familjare dhe mes të prekurve janë dhe persona të vaksinuar.

“Të dhënat epidemiologjike, investigimi i rasteve që janë konfirmuar me variantin ‘Delta’ kanë një historik të fillimit të shenjave klinike nga fundi i majit, 29/05/2021. Gati 13 raste kanë krijuar vatra familjare”, deklaroi zv.ministrja.

Znj. Tomini gjatë një interviste për Euronews Albania bëri të ditur se personat e prekur nga “Delta” paraqiten në gjendje të mirë shëndetësore.

Ndërsa personat e vaksinuar që gjithashtu janë infektuar, zv. ministrja tha se kanë shfaqur shenja të lehta duke mos pasur nevojë për trajtim në spital.

Ajo tha se të gjithë individët që kryejnë të dy dozat e vaksinës, janë të mbrojtur në nivelin mbi 95% ndaj formave të rënda të COVID-19.

Ndërkohë zv.ministrja e Shëndetësisë tha nga ana tjetër se “tek individët që janë të pa vaksinuar agresiviteti ekziston”.

“Sa më shumë të vaksinuar aq më pak terren gjen virusi”, tha znj. Tomini duke shtuar se shihet një përkrahje e gjerë e popullsisë për t’u vaksinuar.

E pyetur nëse do të ndiqet ndonjë politikë kushtetuese për të detyruar qytetarët refuzues që të vaksinohen, znj. Tomini tha se “nuk shihet skepticizëm” por shtoi nga ana tjetër se “në momente të caktuara popullata shfaq preferencë” për llojin e vaksinës.

Në fund, ajo tha se është ende herët për të parashikuar nëse do të kemi mbyllje tjetër apo shtrëngim të masave kufizuese.

Zyrtarisht, ISHP thotë se janë të prekur nga varianti “Delta” 6 persona të vaksinuar me të dy dozat e vaksinave kundër COVID-19. Dy kanë marrë AstraZeneca, dy Pfizer dhe dy të tjerë Coronavax. Nga këta, dy persona janë vaksinuar jashtë Shqipërisë.

LEXONI GJITHASHTU: 

• Masat kufizuese nuk ndryshojnë edhe pse në Shqipëri ka infektime me “Delta”
• Konfirmohet prania e variantit “Delta” në Shqipëri
• Prania e variantit “Delta” në Shqipëri nuk duhet të sjellë panik mes qytetarëve, shpjegon epidemiologu
• Moshat nën 50 vjeç më të rrezikuarat nga varianti Delta i COVID-19