Si “vdiq” Rilindja e Macron në zgjedhjet për Parlamentin Europian

Zgjedhjet euro-parlamentare kanë pasur një efekt të fortë dhe imediat ndaj politikës së brendshme të Francës.

Pasi pësoi një humbje të rëndë përballë nacionalistëve të Grumbullimit Kombëtar, presidenti Macron njoftoi shkrirjen e parlamentit dhe mbajtjen e zgjedhjeve.

Në një fjalim në orët e natës, Macron tha se kishte vendosur t’ia kthente zgjedhjen për të ardhmen politike të vendit elektoratit dhe shpalli 30 qershorin dhe 7 korrikun si datat e zgjedhjeve.

“Ky është një vendim serioz dhe me peshë, por mbi të gjitha është një akt besimi. Besimi tek ju, bashkëkombësit e mi, tek aftësia e popullit francez për të bërë zgjedhjen e duhur për veten dhe gjeneratat e ardhshme”, tha Macron.

Duke folur për mbështetësit, kryetarja e Grumbullimit Kombëtar, Marine le Pen tha se e mirëpriste vendimin e Macron, duke theksuar se partia e saj përfaqëson forcën e ndryshimit.

“Ne jemi gati të ushtrojmë fuqinë tonë nëse qytetarët francezë na japin besimin e tyre në këto zgjedhje. Ne jemi gati ta ndryshojmë vendin, gati të mbrojmë interesat e francezëve, t’i japim fund emigracionit masiv dhe gati ta kthejmë fuqinë blerëse në prioritet”, u shpreh Le Pen.

Grumbullimi Kombëtar doli i pari me 31.7% të votave, duke u kthyer në të parën parti që merr mbi 30 për qind të votave në zgjedhjet evropiane që prej 1984-s. E pozicionuar pas saj, në vendin e dytë, partia Rilindja e Macron mori vetëm 14.5% të votave. Fiks 14% mori edhe Partia Socialiste, që u rendit e treta.

LEXONI GJITHASHTU:

• Kryebashkiakja e Parisit: Zgjedhjet e parakohshme, goditje për Lojërat Olimpike
• E djathta fiton në zgjedhjet kombëtare dhe të BE-së në Bullgari