Irani është shumë më i madh se Izraeli gjeografikisht dhe ka një popullsi prej 90 milionë banorësh, thuajse 10 herë më të madhe se Izraeli; por kjo nuk përkthehet në fuqi më të madhe ushtarake.

Republika Islamike ka investuar shumë në raketa dhe dronë dhe ka një arsenal të gjerë të vetin, ndërsa ka furnizuar edhe lëvizje të ndryshme si atë Hezbollah në Liban dhe rebelët Huthi në Jemen.

Ajo që i mungon është një sistem modern i mbrojtjes ajrore dhe avionë luftarakë. Rusia dyshohet se po bashkëpunon me Iranin për t’i përmirësuar këto, në këmbim të mbështetjes ushtarake që Teherani i ka ofruar Moskës për luftën e saj në Ukrainë, kryesisht me dronët e tipit “Shahed”, që Rusia ka nisur t’i prodhojë edhe vetë.

Si për t’i bërë kontrast, Izraeli ka një nga forcat ajrore më të avancuara në botë. Konkretisht, shteti hebre ka 14 skuadrilje avionësh, përfshirë ata të llojeve “F15”, “F16” dhe modelin e fundit “F35”, i pakapshëm nga radarët.

Gjithashtu, Izraeli ka një eksperiencë shumë më të gjerë se Irani në kryerjen e sulmeve nga brenda territoreve armike.

Sulmi iranian i fundjavës erdhi pas një sulmi ndaj konsullatës iraniane në Siri, në fillim të muajit, ku humbën jetën 2 gjeneralë të Gardës Revolucionare dhe 5 oficerë të tjerë.

Republika Islamike fajësoi Izraelin për ngjarjen. Edhe pse ky i fundit mohoi përgjegjësinë e sulmit, gjerësisht besohet se fshihet pas tij.

Nga ana tjetër, autoritetet iraniane kanë mohuar publikisht porositjen apo përfshirjen në sulmin e 7 tetorit të Hamasit në Izrael.