Vendet perëndimore do të japin edhe 1.5 miliard euro për Ukrainën

Vendet perëndimore të enjten kanë dhënë më shumë se 1.5 miliardë euro në para, pajisje dhe trajnime për të rritur aftësitë ushtarake të Ukrainës në luftën e saj kundër Rusisë.

Kështu u shpreh të enjten ministri danez i Mbrojtjes, Morten Bodskov, shkruan Reuters.

Kjo shumë është premtuar nga 26 shtete, të cilat janë përfaqësuar nga ministrat e Mbrojtjes, në një konferencë të mbajtur në Kopenhagen.

Ministrat e Mbrojtjes të Polonisë, Sllovakisë dhe Republikës Çeke, kanë shprehur gatishmëri për të zgjeruar prodhimin e sistemeve të artilerisë, municionit dhe pajisjeve tjera ushtarake në Ukrainë, ka thënë ministri danez.

Britania është zotuar se do të ndajë 300 milionë euro shtesë, përfshirë sistemet raketore me precizitet të lartë që mund të godasin shënjestrat në largësi prej 80 kilometrash.

Ukraina i ka bërë thirrje të vazhdueshme Perëndimit që t’i dërgojë më shumë armë, përfshirë artilerinë me rreze të gjatë.

LEXONI GJITHASHTU

• Punëtorët në centralin e Zaporizhias: Jemi nën kërcënimin e armëve nga rusët
• Të ndalen sulmet vetëvrasëse në centralin bërthamor të Zaporizhias, thotë OKB-ja