Vetëm dy fitore në dhjetë ndeshjet e fundit, Vllaznia shkarkon trajnerin

Humbja me Bylisin dhe seria prej vetëm dy fitoresh në 10 ndeshjet e fundit i ka kushtuar postin trajnerit të Vllaznisë Thomas Brdariç.

Klubi shkodran zyrtarizoi ndërprerjen e kontratës me 46-vjeçarin, i cili i ngriti fillimisht ata në krye të klasifikimit pas 15 javësh bindëse me lojë. Mirëpo prej janarit skuadra ka vuajtur rezultate të dobëta dhe aktualisht ka vënë në diskutim kryesimin – të cilin mund t’ia marrë Teuta, Laçi apo dhe Partizani.

Brdariç largohet 150 ditë pas nënshkrimit të kontratës. Ai kishte drejtuar disa skuadra gjermane si Rot-Weib Erfurt, TeBe Berlin, apo dhe Shkëndijën e Tetovës.

Drejtimi i skuadrës i ka kaluar Elvis Plorit, ndihmës-trajner i Brdariç-it, të cilit i rëndon detyra që ta nxjerrë Vllazninë nga situata.

Vllaznia nuk shpallet kampion prej vitit 2001. Nëntë herë kampionët e Shqipërisë vuajtën dy vitet e fundit probleme financiare pas ngërçeve të krijuara me administrimin dhe alokimin e fondeve nga Bashkia Shkodër.