“Vetingu me dy standarde”, Arben Frashëri do ankimojë vendimin, edhe sindikata kundër komisionit

Shkarkimi nga detyra pas vetingut i drejtuesit të policisë shkaktoi indinjatë në radhët e gazetarëve të kronikës dhe opinionit publik. Por avokati i tij bën me dije për Euronews Albania se ky vendim do të ankimohet në gjykatë ndërkohë që edhe sindikata e policisë flet për standarde të dyfishta nga ana e komisionit të jashtëm të vlerësimit.

Arben Frashëri me detyrë Drejtor i Drejtorisë Rajonale Fier – Berat për shërbimin për çështjet e brendshme dhe ankesave u shkarkua nga detyra pasi sipas komisionit të jashtëm të vlerësimit nuk justifikoi pasurinë duke mos I njohur të ardhurat në emigracion të tij dhe bashkëshortes, para vitit 1997. Në këto kushte zyrtari i lartë I policisë do ankimojë vendimin sapo ai të zbardhet.

“Ishte vendim i njëanshëm dhe totalisht i ndryshëm nga vendimet e mëparshme të këtij komisioni. Do të vazdhojmë rrugën ligjore, do ta dërgojmë në gjykatën përkatëse. Pasi të lexojmë vendimin do shohim pasi mund ta dërgojmë edhe në SPAK”, u shpreh avokati, Arben Llapi.

Edhe për sindikatën e policisë së shtetit që monitoron procesin e vetingut dhe kërkoi që për disa shkelje të shkarkohej drejtori i përgjithshëm Ardi Veliu, komisioni i jashtëm I vlerësimit po operon me standarte të dyfishta.

“Për sa kohë komisioni favorizon një palë kur kemi të bëjmë me të njëjtat probleme atëherë komisioni e ka humbur besimin se do të zgjidhë problemet në bazë të ligjit. Kemi vendime selektive”, tha Fishta.

Ligji për vetingun në polici është ndryshuar 2 herë duke hequr afatet e përfundimit të procesit ndërsa është kundërshtuar nga presidenti Ilir Meta, i cili ka paralajmëruar se mund të përdoret për qëllime politike dhe kapjen e uniformave blu nga qeveria.