VIDEO/ Aksion i ri i ushtrisë amerikane ndaj një tankeri venezuelian në Oqeanin Indian

Forcat ushtarake amerikane kanë kapur një anije dhe kanë marrë kontrollin e një cisterne të tretë të sanksionuar në Oqeanin Indian, pasi e kanë ndjekur atë në Detin e Karaibeve, tha Pentagoni të martën.

Në një postim në Twitter, Komanda Jugore e SHBA-së tha se forcat kryen një “kërkim, përgjim detar dhe ngjitje në anije” të cisternës Bertha gjatë natës.

“Anija po operonte në kundërshtim me karantinën e Presidentit Trump për anijet e sanksionuara në Karaibe dhe u përpoq të arratisej. Nga Karaibet në Oqeanin Indian, ne e gjurmuam dhe e ndaluam atë”, ka shkruar Pentagoni.

Operacioni kishte për qëllim identifikimin dhe kontrollin e naftës së paligjshme të lidhur me Venezuelën. Vendi është përballur me vite të tëra sanksionesh të SHBA-së mbi naftën e saj dhe është mbështetur në një flotë ” hije ” të cisternave me flamur të rremë për të transportuar naftë bruto në zinxhirët globalë të furnizimit. Trump kishte urdhëruar një karantinë të anijeve të sanksionuara në Karaibe në dhjetor për të ushtruar presion mbi presidentin e atëhershëm të Venezuelës, Nicolas Maduro, përpara se ai të kapej në një operacion ushtarak amerikan në janar.

Anija “Bertha”, e cila thuhet se mban flamurin e Ishujve Kuk, është në një listë anijesh të sanksionuara nga SHBA-të për lidhje me Iranin, sipas të dhënave të postuara në faqen e internetit të Zyrës së Kontrollit të Aseteve të Huaja të Departamentit të Thesarit të SHBA-së.

Videoja e publikuar nga Pentagoni tregon helikopterë ushtarakë amerikanë që shkojnë drejt anijes cisternë, ndërsa administrata amerikane ka shtuar përpjekjet e saj për të kontrolluar burimet energjetike të Venezuelës. Megjithatë, nuk është sqaruar zyrtarisht nëse anija Bertha është vendosur nën kontrollin e plotë të SHBA-së pas hipjes në të.