VIDEO| Ali Ahmeti feston me këngë e çifteli kryeministrin e parë shqiptar në RMV

Politikani shqiptar në RMV, Ali Ahmeti, ka festuar me këngë me çifteli në prag të betimit të Talat Xhaferit si kryeministër i qeverisë teknike të Maqedonisë së Veriut.

Videon e ka publikuar gazetari Adriatik Kelmendi në llogarinë e tij në Facebook.

Kuvendi i Maqedonisë së Veriut votoi me vota 65 pro, kundër tre, pa asnjë abstenim, qeverinë teknike të drejtuar nga kryeministri i parë shqiptar Talat Xhaferi.

Xhaferi në postin e kryeministrit pason Dimitar Kovaçevskin, i cili dha dorëheqje bazuar në Ligjin për zgjedhje, i cili parasheh që në 100 ditë para zgjedhjeve të zgjidhet një Qeveri teknike, e cila ka mandat për organizimin dhe mbarëvajtjen e procesit zgjedhor.

Zgjedhjet parlamentare në Maqedoninë e Veriut do të mbahen më 8 maj, së bashku me zgjedhjet presidenciale.

Pjesë e Qeverisë teknike do të jetë edhe partia maqedonase opozitare, VMRO DPMNE, e cila do të udhëheqë Ministrinë e Punëve të Brendshme dhe atë të Punës dhe Politikës Sociale. Në ekzekutivin teknik, kjo parti do të ketë edhe tri zëvendëskryeministra, me kompetenca të veçanta.

Ndryshime në postet e tjera ministrore nuk do të ketë. Bashkimi Demokratik për Integrim (BDI), Lidhja Social Demokrate (LSDM) dhe Aleanca për Shqiptarët do të vazhdojnë të udhëheqin ministritë që aktualisht kanë nën drejtim.

LEXONI GJITHASHTU:

• Kryeministri i parë shqiptar në RMV, Xhaferi prezanton prioritetet e qeverisë
• RMV për herë të parë me kryeministër shqiptar, betohet sot Talat Xhaferi