VIDEO | Qeveria mbylli kolegjin turk, nxënësit ngrihen në protestë

Nxënës të kolegjit turk “Mehmet Akif”, por edhe një pjesë e stafit që shërbente në të, kanë nisur protestat këtë të premte për mbylljen e shkollës.

Me pankarta në duar, ata kundërshtojnë vendimin e qeverisë për mbylljen e këtij institucioni arsimor.

Më herët gjatë ditës së sotme, ministrja Evis Kushi bëri të ditur se ky vendim është rezultat i konstatimit nga Ministria e Arsimit dhe Sportit të një sërë shkeljeve të legjislacionit në fuqi nga zotëruesit e licencës në fjalë.

Sipas ministres Kushi, kjo shkollë ka nisur procesin mësimor 2022-2023 në një vendndodhje dhe mjedise të tjera, të pamiratuara nga MAS, pra pa certifikimin ligjor përkatës të standardeve të godinës.

Në reagimin e ministres theksohet se ky kolegj nuk i ka plotësuar më tej kriteret ligjore, edhe pse nga ana MAS është kryer dy herë verifikimi i tij; dhe në kushtet e ushtrimit të veprimtarisë jashtë kritereve përkatëse, licenca duhet të revokohet.

Qeveria ka vendosur mbylljen e kolegjit turk në Tiranë “Mehmet Akif Ersoy”. Ky institucion funksiononte në Shqipëri që nga viti 1996 dhe është ndër të parat shkolla të mesme private të hapura në vend pas viteve 90’.

Vendimi i qeverisë ngarkon kolegjin që të mbulojë të gjitha shpenzimet për kryerjen e procedurave për transferimin e nxënësve. Gjithashtu, në vendim, kolegjit i kërkohet që të kthejë pagesat e kryera nga prindërit për pjesën e papërfunduar të shkollimit.

LEXONI GJITHASHTU

• Mbyllja e kolegjit turk, Zaimi: Në 4 vite, kurrë s’kam dëgjuar të flitet për Gylenin
• Ministrja Kushi tregon arsyet e mbylljes së kolegjit turk në Tiranë
• Mbyllet kolegji turk “Mehmet Akif”, qeveria: Shkolla të kthejë pagesat e nxënësve