Zjarret e furishme të ndezura nga erërat uragane kanë shkatërruar qytetin historik të Lahaina në ishullin Maui të Hawait. Brian Schatz, një senator amerikan nga shteti, tha në mediat sociale se Lahaina është “pothuajse totalisht e djegur deri në tokë”.
Lahaina është një qytet historik në skajin perëndimor të Maui. Qendra e saj daton në vitet 1700 dhe është në Regjistrin Kombëtar të Vendeve Historike të SHBA.
Të paktën gjashtë persona humbën jetën nga zjarri në qarkun Maui, thanë zyrtarët të mërkurën. Ndërkohë sistemi spitalor i Maui-t është mbingarkuar me pacientë të djegur dhe njerëz që vuajnë nga thithja e tymit.
“Zjarrfikësit janë ende duke u përpjekur për të vënë nën kontroll zjarret dhe reaguesit tanë të parë janë në modalitetin e kërkimit dhe shpëtimit”, tha senatori Schatz.
Ka pasur raportime se disa njerëz u hodhën në oqean për t’i shpëtuar flakëve që lëviznin me shpejtësi. Roja Bregdetare e SHBA tha se shpëtoi të paktën një duzinë njerëz nga uji.
Kryetari i bashkisë së qarkut Maui, Richard Bissen Jr tha në një konferencë shtypi se shumë shtëpi dhe struktura biznesi u shkatërruan plotësisht. Një banor në qytetin me rreth 12,000 banorë tha për mediat lokale se çdo varkë në portin e qytetit po digjej.
“Duket si diçka nga një film, një film lufte,” tha Chrissy Lovitt për Hawaii News Now.
Zyrtarët thanë se është ende e vështirë të përcaktohet shkalla e vërtetë e dëmit në Maui dhe kanë paralajmëruar se numri i të vdekurve mund të rritet. Rreth 2,100 njerëz janë zhvendosur. Disa të afërm të njerëzve që jetojnë në Lahaina thanë se janë të shqetësuar për anëtarët e familjes që janë zhdukur.
“Unë ende nuk e di se ku është vëllai im i vogël. Nuk e di ku është njerku im”,- tha Tiare Lawrence për Hawaii News Now.
“Të gjithë ata që njoh në Lahaina, shtëpitë e tyre janë djegur,” -tha zonja Lawrence.
Zyrtarët thanë se tre zjarre të mëdha mbeten aktive dhe jashtë kontrollit në Maui.
Disa zjarre po digjen gjithashtu në ishullin e madh, i njohur gjithashtu si ishulli Hawaii, një ishull fqinj me Maui-n.
LEXONI GJITHASHTU:
- Francë| 11 të zhdukur pas zjarrit në qendrën e kujdesit
- Spanja përballet me valën e katërt të të nxehtit, temperaturat deri në 44 gradë
