Vidhet grafiti i Banksy, të dyshuarit shkëpusin një copë të tërë muri nga ndërtesa

Një grafiti që mban autorësinë e artistit të njohur Banksy në Ukrainë, është tentuar të vidhet.

Një nga muralet e realizuara në Ukrainë nga artisti britanik anonim i njohur si Banksy është tentuar të vidhet… Nëse jeni kureshtarë të dini si mund të vidhet një murale, atëherë na lini t’jua tregojmë.

Muralja që paraqiste figurën e një gruaje që mbante të vendosur një maskë kundërgazi dhe një fikëse zjarri në dorë, është tentuar të transportohet bashkë me copën e murit ku ndodhej. Vepra në fjalë qëndronte në një pallat të bombarduar nga forcat ruse në qytetin Hostomel, në rajonin e Bucha-s.

“Një grup njerëzish çmontuan pikturën e artistit me famë botërore, u përpoqën ta transportonin duke përdorur dërrasa druri, por u kapën nga policia dhe forcat e sigurisë”, tregon kreu i departamentit të policisë së Kievit.

Për fat të mirë muralja nuk u arrit të vidhej, teksa autoritetet kanë hapur një hetim ndaj autorëve të cilët e shkulën nga vendi.

Vepra në fjalë është një ndër disa të tilla të tilla të realizuara nga artistë të panjohur dhe që kanë si tematikë agresionin rus ndaj Ukrainës. Artisti britanik Banksy,, muajin që lamë pas konfirmoi se 7 nga këto grafite të pozicionuara në zona të ndryshme të Ukrainës mbajnë firmën e tij.

LEXONI GJITHASHTU:

• Banksy përjetohet brenda kishës, ekspozitë në Firence kushtuar veprave të artistit
• Banksy zbarkon në Ukrainë, grafite në muret e godinave të shkatërruara nga lufta