Vigjilja e Pashkës katolike, Papa drejton meshën në Vatikan

Papa Françesku udhëhoqi në Vatikan shërbesën e vigjiljes së Pashkës, duke mbajtur një predikim 10-minutësh, gjatë një prej momenteve më solemne në kalendarin liturgjik katolik.

Ai hyri në Bazilikën e Shën Pjetrit me karrigen e tij me rrota, pasi kishte shmangur procesionin e së Premtes së Mirë për motive shëndetësore.

Italia po e feston Pashkën nën masa të shtuara sigurie, pas sulmit terrorist në Moskë. Ministria e Brendshme njoftoi se mbikëqyrjet dhe kontrollet janë përforcuar, sidomos në zonat ku ka grumbullime. Masat do të qëndrojnë në fuqi deri në përfundim të Pashkës.

Në Jerusalem, masat e sigurisë bien gjithashtu në sy. Me luftën në Gaza, qyteti pati më pak pelegrinë se zakonisht, ndaj dhe celebrimet mblodhën kryesisht të krishterët vendas. Në Kishën e Varrit të Shenjtë, mesha e shenjtë e së shtunës u udhëhoq nga kleriku i parë katolik në Tokën e Shenjtë.

E ndërsa shumë vende celebruan pashkën me procesionet, në Gjermani ishte koha për marshet e paqes, një traditë që daton në vitet ’60, me të shtunën që ishte dita kryesore e veprimit. Në mbarë vendin u mbajtën mbi 70 evente.

LEXONI GJITHASHTU:

• Besimtarët katolikë festojnë sot Pashkët 
• Basha uron Pashkën: Drita e shpresës të ndezë besimin se ditë më të mira na presin