Vihet në skenën e Korçës shfaqja ‘Tregtari i Venedikut’ nga Uilliam Shekspir

Në teatrin Andon Zako Çajupi në Korçë është vënë në skenë shfaqja “Tregtari i Venedikut” nga dramaturgu i madh anglez Uilliam Shekspir.

Përpara shfaqjes regjisori Qëndrim Rijani tregoi se vënia në skenë e kësaj shfaqjeje ka qenë një përgjegjësi e madhe.

“Ardhja ime në Korçë për herë të katërt është një përgjegjësi më vete. Kjo ka qenë edhe një nga ato lëmshet e mia që kam pasur përpara se të bëj këtë shfaqje, a do arrijmë që përballë publikut të Korçës i cili vërtet pret, të plotësojmë dhe jemi në të njëjtin nivel që kemi qenë apo me mire. Besoj nga reagimet e njerëzve që kanë qenë mbrëmë kemi arritur një qëllim e se do tregojmë një punë të mirë e do dalim faqebardhë”, thotë regjisori i shfaqjes, Qëndrim Rijani.

Aktorët tregojnë veçantinë e kësaj shfaqjeje.

“Për mua vënia e Shekspirit në teatër të Korçës ishte një surprizë e madhe dhe për këtë falënderoj jo vetëm Qëndrimin që e mori përsipër këtë shfaqje, por e Zamiren e cila e ka kërkuar me vite këtë shfaqje në këtë teatër. E vumë me ne fund. Për mua është një mrekulli, aq më shumë aktorët që janë në vende të sakta dhe me karakter të veçanta, siç është roli im, që në jetën time nuk kam bërë ndonjë rol të tillë”, thotë Sotiraq Bratko.

“Për mua është privilegj e nder për të qenë në një periudhë për të qenë pjesë e këtij kasti aktorësh. Jemi përpjekur për të bërë diçka të mirë, uroj që korçarët e jo vetëm do e shijojnë”, thotë Adem Karaga.

“E vështirë në mendim të parë por e lehtë, të lehta ta bëjnë ata, ta bën Sotiraqi, Qëndrimi, Ademi. Të lodhur por të kënaqur e plot me qejf”, shprehet aktori Roerd Toce.

Shfaqja është pritur mjaft mirë nga publiku korçar i cili ka mbushur sallën e teatrit, ndërkohë që shfaqja do të jepet edhe javën tjetër.