Vijon zjarri me përmasa gjigante në pikën e skrapit në Elbasan

Zjarri i madh që ka rënë në fabrikën ‘Kurum’ në Elbasan, ka marrë përmasa të mëdha. Pavarësisht se zjarrfikësit vijojnë ” luftën ” me flakët prej më shumë se 9 orësh zjarri vijon dhe intensiteti i tij sa vjen edhe shtohet.

Zjarri tashmë është përpahur në të gjithë pikën e grumbullimit të skrapit, akumuluar aty prej muajsh.

Kujtojmë që vatra e parë u krijua rreth orës 11:15, dhe dyshohet nga një shkëndijë e krijuar si pasojë e fërkimit të mbetjeve metalike.

Mesditën e sotme në Elbasan ishte edhe Drejtori i Agjencisë së Mbrojtjes Civile, Haki Çako, i cili tha se ndërhyrja nga ajri në vatrën e zjarrit është e pamundur pasi zjarri ka përmasa të mëdha dhe më efektive është ndërhyrja tokësore. Ai theksoi se problemi më i madh është ndotja dhe se zjarri mund të vijojë deri nesër, ndërsa gjendja nuk përbën rrezik as për zonën dhe as për banorët.