Vizita e Vuçiç në Kosovë, Lajçak-Hotit: Pengesa dëmton përpjekjet për marrëveshje mes palëve

Kosova dhe Serbia javën e kaluar kanë arritur një “marrëveshje mirëkuptimi” për të pezulluar vizitat e ndërsjella, për aq kohë sa do të zgjasin gërmimet në varrezat e dyshuara masive, ku mendohet se janë varrosur civilët shqiptarë, të vrarë gjatë luftës së fundit në Kosovë.

Kjo është konfirmuar edhe nga Zëdhënësi i BE-së për Politikë të Jashtme dhe Siguri, Peter Stano

“Ne nuk komentojmë marrëveshje diplomatike apo të mirëkuptimit, të cilat i ka ndërmjetësuar BE-ja me apo mes partnerëve tanë. Por, në këtë rast konkret, mund të konfirmoj, pa hyrë në detaje, se ne kemi ndërmjetësuar një mirëkuptim të tillë mes Kosovës dhe Serbisë lidhur me vizitat e ndërsjella”, ka deklaruar Stano.

Mësohet se marrëveshja u arrit përmes përfaqësuesit të posaçëm për dialogun, Miroslav Lajçak, dhe ai parashikoi që palët të përmbahen nga kërkesa për vizita në Serbi ose Kosovë.

Por reagimi publik i ministres së Jashtme ku deklaron se nuk do të lejohet presidenti serb të vizitojë Kosovën ka sjellë dhe reagimin publik të Lajçak.

Ky në një letër dërguar kryeministrit Hoti thotë se mosrespektimi i të dy marrëveshjeve për lirinë e lëvizjes dhe vizitat dërgon një sinjal shumë negativ për besueshmërinë e Kosovës si palë në procesin e dialogut dhe dëmtojnë përpjekjet për të normalizuar marrëdhëniet.

Iniciativa për këtë marrëveshje u nis për shkak të “nxitimit të papritur të kërkesave” të paraqitura për vizita në Kosovë dhe Serbi, në kohën kur filluan gërmimet në një vend ku dyshohet për një varrezë masive të shqiptarëve të Kosovës të vrarë gjatë luftës.