Vjosa Osmani nderohet me Çmimin e NATO-s për Gratë, Paqen dhe Sigurinë

Presidentja e Kosovës, Vjosa Osmani, është nderuar me Çmimin e Asamblesë Parlamentare të NATO-s për Gratë, Paqen dhe Sigurinë, një vlerësim prestigjioz ndërkombëtar që nderon gratë lidere për kontributin e tyre në ndërtimin e paqes, forcimin e sigurisë dhe avancimin e demokracisë.

Në ceremoninë e ndarjes së çmimit, Osmani tha se ky vlerësim i dedikohet popullit të Kosovës, e në veçanti grave që, sipas saj, kanë luajtur një rol të pazëvendësueshëm në rrugëtimin e vendit drejt lirisë dhe paqes.

“Ky është një nder i veçantë që sot ta pranoj Çmimin e Asamblesë Parlamentare të NATO-s për Gratë, Paqen dhe Sigurinë. Këtë vlerësim të jashtëzakonshëm ia dedikoj popullit të Kosovës, e në veçanti grave të Kosovës, të cilat me guxim, dinjitet e përkushtim ndihmuan arritjen e lirisë dhe ndërtimin e paqes,” – tha Osmani në fjalimin e saj.

Ajo theksoi se ky çmim është për të gjitha gratë që nuk u dorëzuan kurrë, për ato që udhëhoqën protesta, morën pjesë në luftë dhe ndërtuan institucione, si dhe për nënat që ende presin të mësojnë për fatin e të dashurve të tyre të zhdukur dhunshëm gjatë luftës.

“Është çmim për kampionet e të drejtave të njeriut, për të mbijetuarat që nuk rreshtën së kërkuari drejtësi, dhe për vajzat e reja që sot udhëheqin çdo fushë me besim e vizion. Paqja jonë është ndërtuar mbi sakrificën dhe guximin e tyre, ndërsa demokracia jonë është forcuar falë angazhimit të pashoq të grave që qëndruan të palëkundura në çdo hap të rrugëtimit tonë drejt lirisë e barazisë,” – u shpreh Presidentja e Kosovës.

Çmimi për Gratë, Paqen dhe Sigurinë i Asamblesë Parlamentare të NATO-s jepet për figura që kanë kontribuar ndjeshëm në avancimin e rolit të grave në shoqëri, siguri dhe demokraci. Ky vlerësim për Vjosa Osmanin përforcon rolin e saj si një prej zërave më të spikatur në rajon për fuqizimin e gruas dhe lidershipin demokratik.