Vlora katër ditë pa ujë, reagon Kryeministri Edi Rama: Vlonjatëve të mi i kërkoj ndjesë

Kryeministri Edi Rama ka reaguar sot lidhur me situatën problematike të krijuar në Vlorë gjatë katër ditëve të fundit, ku është përjetuar një krizë mungese uji. Mungesa e ujit është shoqëruar me protesta dhe revolta, deri në përplasje fizike mes qytetarëve dhe policisë, të cilët kanë reaguar pranë institucioneve.

Në një postim në “X”, Rama shprehet se defekti i rëndë daton që nga vitet 2009-2010 dhe lidhet me një instalim që, sipas tij, është bërë jashtë standardeve. Më tej, Kryeministri thekson se punonjësit po vijojnë punën e palodhur në këtë operacion, i cili është, sipas tij, shumë i vështirë. Nga ana tjetër, ai përfundon me ironi duke shprehur se kjo situatë është pasojë e “syrit të keq”, për të gjitha vitet e mira që, sipas tij, kanë kaluar për Vlorën.

Reagimi i Ramës:

Drejt aeroportit të Stambollit për të ardhur sot brenda ditës, pjesët e reja hidraulike për riparimin e difektit të rëndë në ujësjellësin e Vlorës, ku në vitin 2009-2010 janë instaluar pjesë  hidraulike jashtë standarteve, që nuk e kanë mbajtur dot më presionin e ujit dhe për pasojë tubacioni ka shpërthyer…

Respekt për punën e palodhur të punëtorëve të ujësjellësit Vlorë, që nën drejtimin e drejtorit të përgjithshëm të Agjencisë Kombëtare të Ujësjellës-Kanalizimeve,  inxhinierit të njohur Flauers Shoshi, i cili prej disa ditësh e netësh gjendet në krye të operacionit të vështirë, po bëjnë të pamundurën për ta mbyllur këtë plagë të hapur në trupin e Vlorës prej një mine të vjetër nga një kohë e zezë për Vlorën🙏

Vlonjatëve të mi u them ndjesë për tërë këtë peripeci të pamerituar dhe siç thoshin gjyshet tona plasi më në fund edhe syri i keq pas tërë këtyre viteve të mira për Vlorën, e ja që kush i do të keqen Vlorës, veç të keqen do i marrë