Vodhi varëse floriri dhe kanosi pronarin e argjendarisë, arrestohet 38-vjeçari në Elbasan

Një 38-vjeçar është arrestuar nga Policia e Elbasanit, pasi dyshohet se vodhi varëse floriri në një argjendari dhe më pas kanosi pronarin e saj.

Ngjarja ka ndodhur më 25 mars 2026, në lagjen “Namazgja”, ku shtetasi me inicialet B. H., banues në Elbasan, dyshohet se ka marrë 3 varëse floriri nga një argjendari.

Sipas policisë, gjatë ndërhyrjes së pronarit për t’i rimarrë sendet e vjedhura, autori e ka kanosur atë që të mos e kallëzonte dhe më pas është larguar me vrap.

Më pas, shërbimet e Komisariatit të Policisë Elbasan bënë të mundur identifikimin, kapjen dhe arrestimin e 38-vjeçarit.

Mësohet se i arrestuari është i dënuar më parë për krime kundër personit dhe pasurisë, ndërsa hetimet vijojnë për dokumentimin e plotë të ngjarjes.