Volejbollistja 20-vjeçare gjendet e vdekur në pishinë gjatë një feste në Palermo

Një vajzë 20-vjeçare u gjet e vdekur mbrëmjen e kaluar në një pishinë gjatë një feste të organizuar në një vilë private në Bagheria, pranë Palermos.

Viktima është Simona Cina, një lojtare premtuese volejbolli, e cila sipas hetimeve paraprake, ra në ujë dhe nuk arriti të shpëtonte.

Shërbimet mjekësore mbërritën në vendngjarje, por vetëm konfirmuan vdekjen e saj. Trupi i të resë u sekuestrua dhe është urdhëruar autopsia.

Alarmi u dha rreth orës 04:30 të mëngjesit, kur disa prej miqve e gjetën trupin e saj në fund të pishinës rreth 2 metra të thellë. Në festë ishin rreth 80 persona, të cilët janë marrë në pyetje gjatë gjithë natës.

Hetimet – ADN dhe gjurmë gjaku në vendngjarje

Një nga të rinjtë që mori pjesë në festë është dërguar për testim të ADN-së, pasi në vilë u gjetën gjurmë gjaku. I riu ka deklaruar se ishte lënduar pasi goditi një makinë nga inati kur mësoi për vdekjen e Simonës. Megjithatë, hetimet për këtë element të çështjes do të vijojnë.

Familja kërkon sqarime: “Ka shumë pikëpyetje”

Avokati i familjes, Gabriele Giambrone, ka ngritur dyshime lidhur me rrethanat e vdekjes së Simonës: “Ka shumë gjëra që nuk përputhen. Për një kohë të gjatë askush nuk besoi se Simona ishte në ujë. Pishina është e vogël dhe vila ishte e mbushur me të rinj. Për më tepër, ajo u gjet me fytyrën lart, çka nuk përputhet me një rënie të zakonshme. Edhe nëse ka pësuar ndonjë shqetësim në ujë, si është e mundur që askush nuk e pa?”

Lamtumira nga ekipi i saj

“Simona ishte një vajzë e gëzuar dhe plot jetë. Volejbolli ishte gjithçka për të,” – u shpreh Paolo Di Maggio, president i ACDS Capacense Volley. “Luajti me ne deri vitin e kaluar, dhe gjatë verës merrte pjesë në turne plazhi. Një humbje e madhe për komunitetin dhe sportin.”

Simona dhe pasioni për volejbollin

Simona Cina kishte luajtur për vite me radhë me ekipin Capacense, përpara se të përqendrohej në volejbollin e plazhit, ku ishte renditur e 257-ta në nivel global. Ajo kishte marrë pjesë në një festë diplomimi të një mikeshë nga Palermo, së bashku me disa shoqe të saj nga Capaci. Studente e shkencave sportive në Palermo, ajo pritej të nisej në shtator për një shkëmbim studimesh Erasmus. Përveç volejbollit, ishte edhe një surfiste e talentuar.