Volkswagen mbyll katër fabrika në Gjermani, rreth 40.000 vende pune janë në rrezik

Planet për mbylljen e fabrikave të Grupit Volkswagen në Gjermani po marrin formë konkrete dhe deri në vitin 2034 është planifikuar të mbyllen katër fabrika prodhimi, shkruan revista gjermane “Spiegel”.

Për shkak të protestave në të gjitha fabrikat në Gjermani, Bordi Mbikëqyrës i kompanisë do të mblidhet në pasdite për të diskutuar planin e ardhshëm, i cili, sipas Spiegel, parashikon mbylljen e katër fabrikave deri në vitin 2034.

Përpara takimit, kompania tregoi domosdoshmërinë e shkurtimeve drastike.

“Do të na duhet të zvogëlojmë kapacitetin e tepërt”, tha një zëdhënës i Volkswagen.

Edhe pse Bordet e Menaxhimit dhe Mbikëqyrjes ndajnë shqetësimet e punonjësve, qëllimi është që grupi të jetë më i fortë dhe më konkurrues, shtoi ai.

Prodhimi në fabrikat e automjeteve në Zwickau dhe Emden do të ndërpritet gradualisht gjatë pesë viteve, raportoi Spiegel, duke cituar burime nga Bordi Mbikëqyrës.

Mbyllja e fabrikës së automjeteve komerciale në Hanover duhet të pasojë në vitin 2032, dhe e fabrikës së Audi-t në Neckarsulm në vitin 2034.

Volkswagen nuk pranoi të komentojë mbi lajmin për mbylljen e katër fabrikave që punësojnë rreth 40,000 njerëz.

Drejtori i përgjithshëm Oliver Blum planifikon të zhvendosë prodhimin e modeleve që prodhohen aktualisht në ato fabrika në fabrika më të lira në Evropën Lindore.

Po kërkohen përdorime alternative për fabrikat në Gjermani, të tilla si shitjet për kompani nga industria e dedikuar ose për montimin e makinave të zhvilluara në Kinë, sipas burimeve të paidentifikuara, të cilët tregojnë se kjo është kryesisht një mundësi për uzinën e Zwickau-t.