Von der Leyen humb betejën, Gjykata: Nuk bëri transparencë për vaksinat anti-COVID

Komisioni Evropian nuk i dha publikut akses të mjaftueshëm për kontratat e vaksinave anti-COVID. Kështu ka deklaruar Gjykata Evropiane e Drejtësisë.

Mungesa e informacionit prek në veçanti deklaratat mbi mungesën e konfliktit të interesit dhe kompensimit.

Rastësisht, ky verdikt i shumëpritur u dha një ditë përpara se Parlamenti Evropian në Strasburg të votojë për zgjedhjen e presidentes së Komisionit Evropian.

Bëhet fjalë për një votim kyç për Ursula von der Leyen, që garon për mandatin e dytë. Vetë KE u përgjigj duke thënë se garanton akses në dokumente në bazë të rregullave të transparencës.

“Sipas gjykatës, Komisioni duhet të kishte ofruar më shumë justifikime për refuzimin për t’i lejuar akses në disa dispozita të kontratave. Ndaj kjo është më tepër çështje justifikimi se sa një çështje e bazuar”, tha Stefan de Keersmaecker, zëdhënës i Komisionit Evropian.

Sipas gjykatës, blerja e vaksinave për llogari të 27 vendeve anëtare i lejoi bllokut të lëvronte me shpejtësi 2.7 miliardë euro për të bërë një porosi për më shumë se 1 miliard dozash.

Gjykata ishte kritikuar nga ligjvënës evropianë dhe individë, që pretendonin se Komisioni kishte dhënë vetëm akses të pjesshëm tek kontratat. OJQ-ja “Transparency International”, që lufton korrupsionin në botë, përshëndeti vendimin.

“Ky është një lajm shumë i mirë për transparencën dhe etikën në nivel evropian. Por është për të ardhur keq që na u desh të prisnim për këtë vendim dhe që Komisioni nuk garantoi transparencë, por ofroi vetëm një akses paraprak. Shpresojmë që verdikti të inkurajojë Komisionin të jetë më transparent në të ardhmen”, u shpreh Shari Hinds, Transparency International.

Një tjetër çështje për shkëmbimin e mesazheve mes Von der Leyen dhe shefit të “Pfizer” për porositë e vaksinave është në zhvillim.

LEXONI GJITHASHTU:

• Partia e Gjelbër refuzon von der Leyen në përpjekjen e saj për mandatin e dytë
• Zgjedhjet në BE, Von der Leyen: Ekstremi i djathtë nuk bëri aq mirë sa pritej