Votat e ish-deputetit Arifi tronditën skenën politike, dënimi për mashtrim çoi Kosovën në zgjedhje

Votat e ish-deputetit Etem Arifi për rrëzimin e qeverisë Kurti e më pas ngritjen e qeverisë Hoti, tronditi skenën politike në Kosovë, pasi u vërtetua se ishin antikushtetuese.

Kur votoi në dy seancat, deputeti ishte dënuar me burg për mashtrim. Me arsyetimin se ishte i sëmurë, ai i shmangej burgut, por jo pjesëmarrjes në Kuvend.

Që prej shtatorit, qeveria Hoti nuk i ka 61 vota në Kuvend, sepse deputeti Etem Arifi nga komuniteti Ashkali, vota e të cilit ia mundëson koalicionit shumicën e thjeshtë, ndodhet në burg.

Bazuar në Ligjin për Zgjedhje, ish-deputetin Arifi, e zëvendëson i dyti në listë nga kjo parti, me më shumë vota. Në këtë rast, është zëvendësministri Qazim Rrahmani.

Në prill 2018, Etem Arifi u dënua me dy vjet burg për mashtrim fondesh prej 26 mijë eurosh.

Fajësia iu vërtetua nga Apeli me 20 gusht 2020, por iu hoqën nëntë muaj nga dënimi.

Sipas Kushtetutës, mandati i deputetit mbaron nëse ligjvënësi dënohet me një ose më shumë vjet burg. Pavarësisht dënimit, Arifi votoi në dy seanca të rëndësishme të Kuvendit, meqë gjykata ia miratoi kërkesat, që për arsye shëndetësore, të mos shkojë prapa hekurave.

Më 25 mars, Arifi dha votën pro rrëzimit të qeverisë Kurti, e me 3 qershor, gjithashtu votoi pro ngritjes së qeverisë Hoti. Kërkesën për vlerësimin e ligjshmërisë së pjesëmarrjes në votim të deputetit Arifi në ato dy seanca, derisa ishte i dënuar, Lëvizja Vetëvendosje e dërgoi në Gjykatën Kushtetuese më 11 qershor. Ndërkohë ditën e djeshme Gjykata Kushtetuese dha vendimin e saj për rrëzimin e qeverisë Hoti.

Lexoni gjithashtu:

Analistja Emini: Hoti e ka mbajtur qeverinë me zor, nëse s’ka zgjedhje muajin e ardhshëm, do ketë probleme

Gjykata Kushtetuese rrëzon qeverinë “Hoti”, Osmani takim me partitë politike për datën e zgjedhjeve

Kosova shkon në zgjedhje të reja, Gjykata Kushtetuese rrëzon qeverinë “Hoti”