Vrasja e 17-vjeçarit në Francë, Macron dhe ligjvënësit kundër policisë

Zona periferike e Parisit, Nanterr, ka kaluar një tjetër natë trazirash pasa vrasjes fatale të një 17-vjeçari nga policia.

Disa mijëra forca sigurie u angazhuan mbrëmjen e së mërkurës nga frika e protestave të dhunshme.

Adoleshenti, i quajtur Nahel, u qëllua në distancë të afërt teksa po ecte me makinën e tij gjatë një kontrolli policor.

Incidenti ka rindezur debatet mbi taktikat e policisë në Francë me grupet e të drejtave të njeriut, që akuzojnë për përdorimin e dorës së hekurt në periferitë e varfra ku jetojnë pakicat etnike.

Politikanë nga të gjitha partitë kanë dënuar vrasjen. Ligjvënësit mbajtën në Parlament një minutë heshtje për adoleshentin, ndërsa kryeministrja Elisabeth Borne kritikoi vendimin e oficerit për të qëlluar.

Edhe presidenti Emmanuel Macron e ka cilësuar vdekjen e 17-vjeçarit si “të pafalshme”.

“Së pari do të doja të shprehja keqardhjen e të gjithë vendit për vdekjen e djaloshit Nael dhe t’i shpreh familjes së tij solidaritetin tonë. Kemi një adoleshent të vrarë dhe kjo është e pashpjegueshme”, tha Macron.

Zemërimi është përhapur edhe në qytete të tjera të vendit, si Tuluz dhe Lile’. Të gjitha qeveritë franceze përndiqen nga frika e përsëritjes së kryengritjeve të vitit 2005, të shkaktuara nga vdekja e dy djemve me ngjyrë teksa ndiqeshin nga policia.

Ngjarjet e atëhershme shkaktuan djegien e 10 mijë automjeteve në shenjë proteste dhe çuan në arrestimin e 6 mijë personave.

LEXONI GJITHASHTU:

• Të paktën 150 të arrestuar gjatë trazirave në Francë
• Policia vret adoleshentin, shpërthejnë protestat në Paris