Vrasja e çiftit në Lezhë, Skënder Hitaj jep detaje të reja lidhur me autorët

Policia e Shtetit deklaron se po vijojnë intensivisht hetimet për atentatin e ndodhur në Balldre të Lezhës, ku humbën jetën Kreshnik dhe Gentjana Mujeci, ndërsa autorët ende nuk janë identifikuar apo arrestuar.

Në një konferencë për mediat, Drejtori i Përgjithshëm i Policisë së Shtetit, Skënder Hita, bëri me dije se edhe mëngjesin e kësaj të enjteje janë zhvilluar kontrolle në zonë nga Forcat Speciale RENEA.

“Policia që në momentet e para ka bërë një komunikim të drejtpërdrejtë menjëherë nga vendngjarja. Hetimet kanë vijuar edhe sot në mëngjes, ku kemi kryer disa kontrolle me forcat speciale RENEA, por ende nuk është bërë e mundur kapja e autorëve të dyshuar. Puna vazhdon intensivisht. Nuk është jashtë vëmendjes dhe jashtë harresës”, u shpreh Hita.

Sipas Policisë, grupet hetimore po punojnë për dokumentimin e plotë të ngjarjes dhe identifikimin e personave të përfshirë në atentat.