Komiteti Ndërkombëtar i Shpëtimit deklaroi se vrasja e punonjësve humanitarë nga sulmi izraelit vë në dukje se Gaza është vendi më i rrezikshëm në botë.
“Ne kemi parë një rritje të vëmendjes ndërkombëtare ndaj kësaj çështjeje, ndaj sigurisë së punonjësve humanitarë, pjesërisht për shkak të kombësisë së atyre që u vranë të hënën. Ky është një realitet i hidhur, por nëse një e mirë mund të vijë nga vëmendja, ajo është rritja e vëmendjes politike dhe diplomatike, e fokusuar jo vetëm tek siguria e punonjësve, që në vetvete është e rëndësishme, por në krijimin e kushteve të duhura në të cilat ndihma për palestinezët e Gazës mund të shpërndahet”,-u shpreh Ciarán Donnelly nga Komiteti Ndërkombëtar i Shpëtimit.
Ndërkohë, zëdhënësja e Shtëpisë së Bardhë, Karine Jean Pierre deklaroi se presidenti amerikan ndihet “zemërthyer” për vdekjen e 7 punonjësve në Gaza dhe shtoi se për të mbrojtur civilët duhet të arrihet një akord për lirimin e pengjeve.
Kryeministri spanjoll, Pedro Sanchez deklaroi se deklaratat e kryeministrit izraelit Benjamin Netanyahu pas sulmit ajror që vrau 7 punonjësit humanitarë ishin “të pamjaftueshme”.
Ndërsa kryeministri i Katarit e konsideroi sulmin një shkelje të ligjeve ndërkombëtare dhe i bëri thirrje komunitetit ndërkombëtar që të veprojë.
Ndërkohë, Benny Gantz, anëtar i kabinetit izraelit të luftës, i bëri thirrje Netanyahut që të pranojë mbajtjen e zgjedhjeve të reja më vonë gjatë vitit.
Gantz e bëri apelin e tij në një konferencë shtypi, ku tha se mbajtja e zgjedhjeve është e rëndësishme për të kthyer besimin e publikut tek qeveria.
LEXONI GJITHASHTU:
- Gaza| Mes shtatë vullnetarëve të vrarë, numërohen edhe punonjës britanik
- Ukraina dhe Gaza në qendër të vizitës së Sekretarit Blinken në Evropë
