Vrasje në një qendër ndihmash në Gaza, OKB bën thirrje për hetime

Sekretari i Përgjithshëm i Kombeve të Bashkuara, António Guterres, ka kërkuar një hetim të pavarur dhe të menjëhershëm pas raporteve për vrasjen e civilëve palestinezë pranë një qendre shpërndarjeje ndihmash në Rafah, Gaza, të dielën.

Incidenti ndodhi pranë një qendre të menaxhuar nga Fondacioni Humanitar i Gazës (GHF), i cili mbështetet nga SHBA-të dhe Izraeli. Dëshmitarët raportuan se forcat izraelite hapën zjarr ndaj turmës që priste për të marrë ndihma ushqimore. Ushtria izraelite mohoi akuzat, duke i cilësuar raportet si të rreme dhe duke shtuar se nuk kishte prova për ndonjë sulm të tillë në ose pranë qendrës së ndihmave.

Sipas të dhënave nga Kryqi i Kuq, spitali i tij priti 179 të plagosur, ndërsa 21 persona humbën jetën. Ndërkohë, Agjencia e Mbrojtjes Civile e udhëhequr nga Hamasi raportoi për 31 viktima.

GHF i hodhi poshtë raportimet, duke i quajtur ato “trillime të plota”, dhe deklaroi se nuk kishte dëshmi për një sulm ndaj qendrës së tyre.

Për shkak të ndalimit të mediave ndërkombëtare, përfshirë BBC-në, për të hyrë në Gaza, verifikimi i pavarur i ngjarjeve mbetet i vështirë.

Në një deklaratë të dhënë të hënën, Guterres u shpreh: “Jam i tmerruar nga raportet për palestinezët e vrarë dhe të plagosur ndërsa kërkonin ndihmë në Gaza dje. Bëj thirrje për një hetim të menjëhershëm dhe të pavarur për këto ngjarje dhe që autorët të mbahen përgjegjës.”

Ministria e Jashtme e Izraelit reagoi ashpër ndaj deklaratës së Guterres, duke e quajtur atë një “turp” dhe e kritikoi për faktin që nuk përmendi Hamasin në deklaratën e tij.

LEXONI GJITHASHTU:

• Incident tjetër fatal pranë një qendre ndihmash në Rafah, 24 të vdekur
• Koreja e Jugut voton në zgjedhjet e parakohshme pas shkarkimit të presidentit Yoon