Vrau 77 persona, neonazisti Anders Breivik humbet mundësinë për të dalë nga izolimi

Neonazisti Anders Brevik, i cili vrau 77 persona në Norvegji në vitin 2011, ka humbur çështjen kundër shtetit në përpjekje për t’i dhënë fund viteve të izolimit të tij në burg. Breivik kishte paditur autoritetet norvegjeze, duke pretenduar se kushtet e tij ishin “çnjerëzore” dhe ai ishte vetëvrasës.

Por një gjykatë vendosi të enjten se kushtet e dënimit të Breivik “nuk ishin shkelje e të drejtave të njeriut”.

Avokati i Breivik tha se klienti i tij ishte i zhgënjyer me rezultatin dhe do të apelonte kundër vendimit të fundit. Ai është mbajtur i izoluar që kur vrau tetë persona me një makinë bombë dhe vrau 69 të tjerë, shumica prej tyre adoleshentë, në një kamp veror të të rinjve në ishullin Utoeya më 22 korrik 2011.

Aktualisht ai po vuan një dënim prej 21 vitesh, maksimumi që mund të vendosë një gjykatë në Norvegji, megjithëse mund të zgjatet për aq kohë sa ai konsiderohet si kërcënim.

Avokatët e tij pretenduan se ai kishte jetuar në një “botë plotësisht të mbyllur” dhe “nuk dëshironte të ishte më gjallë”. Ata i kishin kërkuar gjykatës heqjen e kufizimeve për korrespondencën e tij me botën e jashtme.

Por gjyqtarët në Gjykatën e Qarkut të Oslos të enjten thanë se kufizimet e vendosura në komunikimet e Breivik ishin të justifikuara sepse ai mbetej një rrezik për shoqërinë.

Ata vendosën se ai gëzonte “liri relativisht të madhe” në objekt dhe kishte akses në shumë shërbime në jetën e tij të përditshme.

“Ai studion dhe punon në projektet e tij politike”, thuhej në vendim.

LEXONI GJITHASHTU:

• Gjykata refuzon lirimin me kusht të Breivik, norvegjezit që vrau 77 persona
• Vrasësi i 77 personave padi kundër shtetit, pretendon për shkeljen e të drejtave