Vritet me snajper në varrimin e së ëmës ish-separatisti korsikan

Një skenë e denjë për një film të Hollywood-it është verifikuar në ishullin francez të Korsikës, ku një ish-lider i separatistëve është qëlluar për vdekje nga një snajper gjatë varrimit të së ëmës, në fshatin Vero.

Alain Orsoni, gjithashtu biznesmen dhe ish-president i klubit të futbollit AC Ajaccio, u vra nga një plumb i vetëm – bënë të ditur autoritetet lokale.

Prokurori i qytetit të Ajacios, Nicolas Septe tha se 71-vjecari u qëllua nga një distancë e gjatë prej disa qindra metrash.

“Ai u qëllua direkt e në zemër nga një plumb dhe në distancë shumë të gjatë”, tha hetuesi për shtypin francez.

Ngjarja ka shkaktuar shqetësim në radhët e popullsisë, e cila druhet se ajo mund të ketë një efekt domino dhe të pasohet nga gjakderdhja.

Orsoni kishte udhëtuar nga Nikaragua, ku jetonte, për të marrë pjesë në varrimin e së ëmës në fshatin e tij të lindjes, rreth 30 kilometra në veri të Ajacios.

Prokuroria Kombëtare Kundër Krimit të Organizuar ka marrë përsipër hetimet, me dyshimet e para që bien mbi një bandë kriminale lokale.

Orsoni u bë lider i Frontit për Çlirimin Kombëtar të Korsikës në vitet ’80, pas vrasjes së të vëllait në 1983-shin. Në vitet ’90, kur u shkëput nga lëvizja separatiste, ai u angazhua në biznesin e lojërave të fatit.

Djali i tij, Guy Orsoni, lindur në vitin 1984, konsiderohet një figurë e rëndësishme e krimit të organizuar korsikan.