Presidenti i Serbisë, Aleksandër Vuçiç, ka publikuar në rrjetin social Instagram një fotografi nga Tirana, ku shihet në krah të kryeministrit Rama.
Takimi është zhvilluar mbrëmjen e të mërkurës pas përfundimit të Samitit të Ukrainës, ku liderët e rajonit pritet të marrin pjesë sot në samitin rajonal mes Ballkanit Perëndimor dhe Bashkimit Evropian.
Të pranishëm në taklimin Rama-Vuçiç ishin dhe komisioneri evropian për Fqinjësi dhe Zgjerim, Oliver Varhelyi dhe Gert Jan Koopman, drejtor i përgjithshëm i grupit negociator të KE për Fqinjësinë dhe Zgjerimin.
Vuçiç ka shkruar se janë mbledhur për tema që sipas tij janë jetike për Ballkanin Perëndimor.
Ai ka përmendur “lidhjen e ekonomive dhe heqjen e barrierave”.
“Ne jemi mbledhur këtu për të diskutuar tema që janë me rëndësi jetike për Ballkanin Perëndimor. Lidhja e ekonomive, heqja e barrierave dhe përparimi drejt një tregu të vetëm janë synimet kryesore që çojnë në zhvillimin thelbësor të vendit dhe rajonit tonë dhe një të ardhme më të mirë për të gjithë qytetarët tanë”, ka shkruar Vuçiç.
