Për të dytin vit radhazi është rikthyer Konkursi Ndërkombëtar i Fotografisë dhe Video Rees “Wanderlust in Albania”.

Bukuritë e Shqipërisë erdhën përmes syve të vetë udhëtarëve dhe vizitorëve me fotografi dhe video reels që ata kanë realizuar gjatë udhëtimeve të tyre në vendin tonë, ndërsa u paraqitën për publikun në një ceremoni gala në Pallatin e Brigadave.

“Ky konkurs në këtë edicion të dytë dëshmon një etapë të re në zhvillimin e turizmit tone. Pjesëmarrja e gjerë në këtë konkurs me konkurrentë nga 37 vende të botës, përfaqësues të pesë kontinenteve tregon se jo vetëm interesi ndaj Shqipërisë turistike është rritur me ritme të shpejta këto vitet e fundit, por njëkohësisht është rritur edhe angazhimi ndërkombëtar në promovimin e Shqipërisë turistike”,-tha Zana Çela drejtuese e Agjencisë Kombëtare të Turizmit.

Risi e këtij edicioni të konkursit është kategoria CGI (Computer Generated Imagery), që integron artin dixhital dhe animacionin në promovimin e turizmit  shqiptar. Në mbrëmjen gala u ndanë 40 çmime speciale dhe 33 fitues për 11 kategori u shpallën “Kontribues të Promovimit të Turizmit të Shqipërisë”; 4 fitues u nderuan me titullin “Ambasadorë të Turizmit Shqiptar” dhe po ashtu, nga votimi online i publikut u përzgjodhën 3 fitues.

 “Jam udhërrëfyes prej 12 vitesh dhe pasioni i fotografisë ka lindur nga puna që bëjmë. Çdo foto ka një mesazh dhe mundohemi ta transmetojmë dhe pse jo të jetë pjesë e publicitetit dhe të shtohen ambasadorët për vendin tone”,-tha Beri Alla, fitues i konkursit të fotografisë në kategorinë e peizazhit.

 “Për mua ka qenë kënaqësi që vitin e kaluar të shkoj në festën e gështenjave në Tropojë, ku përpos pamjeve mahnitëse pata dhe histori njerëzore, që njerëzit dhe familjet që jetojnë atje gështenjën nuk e konsideronin vetëm si frut, por është buka në pemë, siç thonë ata”,-tha Yllka Fetahaj, fituese në kategorinë e agroturizmit dhe kulinarisë.

Pjesëmarrës në konkurs kishte edhe nga vende të  largëta, si Mauritius, Kolumbia, Uruguaj, Indonezia dhe të tjera, të cilët kishin ngarkuar 5504 materiale në uebsajtin zyrtar të konkursit.

Nga totali i materialeve të paraqitura në konkurs, 800 fotografi  dhe 100 video reels të përzgjedhura  i shtohen fondit të Agjencisë Kombëtare të Turizmit dhe do të përdoren në materialet  promocionale të Shqipërisë turistike duke përfshirë revista, albume, fletë informuese, broshura si  dhe spote publicitare.

LEXONI GJITHASHTU:

• “Nëse s’ka asgjë për të ofruar…” – Orban kërcënon me largim nga Bashkimi Evropian
• Sulmi ndaj turistëve, trupat indiane dhe pakistaneze shkëmbejnë zjarr në Kashmir