Witkoff njofton fillimin e fazës së dytë të planit të Trump për fundin e luftës në Gaza

I dërguari special i presidentit Donald Trump, Steve Witkoff njoftoi të mërkurën nisjen e fazës së dytë të planit për t’i dhënë fund konfliktit në Gaza.

Shtetet e Bashkuara, sipas deklaratës, presin që Hamasi të përmbushë plotësisht detyrimet e tij, përfshirë kthimin e menjëhershëm të pengut të fundit të vdekur. Përndryshe, ata paralajmërojnë se do të ketë pasoja serioze.

“SHBA-të presin që Hamasi t’i përmbushë plotësisht detyrimet e veta, përfshirë kthimin e menjëhershëm të pengut të fundit të ndjerë. Mosveprimi në këtë drejtim do të sjellë pasoja serioze”, shkroi Witkoff në një postim në X.

Faza e dytë shënon kalimin nga armëpushimi në një kornizë të re që përfshin demilitarizimin e plotë, qeverisjen teknokratike dhe rindërtimin e zonës. Kjo kornizë parashikon krijimin e një administrate teknokratike palestineze kalimtare në Gaza, të quajtur Komiteti Kombëtar për Administrimin e Gazës (NCAG).

Faza e parë e planit çoi në ofrimin e gjerë të ndihmës humanitare, ruajtjen e armëpushimit dhe kthimin e të gjithë pengjeve të gjallë, si dhe të mbetjeve të 27 nga 28 të vdekurit.

Në të njëjtën kohë, ai shprehu mirënjohjen e SHBA-së për Egjiptin, Turqinë dhe Katarin, duke theksuar se ndërmjetësimi i tyre ka qenë vendimtar për progresin e bërë deri më sot.