Zbardhet telefonata mes Erdogan dhe Trump

Presidenti turk, Rexhep Tajip Erdogan dhe homologu i tij i SHBA-së Donald Trump kanë zhvilluar një bisedë telefonike ndërsa mësohet se kanë diskutuar lidhur me armëpushimin me Iranin dhe nevojën për të siguruar një paqe të qëndrueshme.

Më tej Presidenca turke bën me dije se Erdogan kërkoi që të përdoret një dritare mundësie dyjavore për të parandaluar përshkallëzimin e ri.

Gjatë bisedës telefonike, të dy udhëheqësit shqyrtuan zhvillimet e fundit në rajon, veçanërisht armëpushimin e shpallur gjatë natës në lidhje me Iranin.

Erdogan shprehu kënaqësinë për armëpushimin dhe theksoi se periudha dyjavore pas javëve të konfliktit intensiv duhet të përdoret në mënyrë efektive për të arritur një marrëveshje të përhershme paqeje. Ai paralajmëroi kundër çdo përpjekjeje për të minuar ose prishur procesin.

Presidenti turk nënvizoi gjithashtu se Turqia do të vazhdojë të mbështesë përpjekjet diplomatike përkrah vendeve mike dhe vëllazërore, veçanërisht Pakistanit, për të ndihmuar në sigurimin e një zgjidhjeje të konfliktit.