Zbulohet anija ruse pranë kabllit të Detit Baltik, ndërhyn Polonia

Ushtria polake ndërhyri në Detin Baltik pasi një anije ruse kreu “manovra të dyshimta” pranë një kablli energjie që lidh Poloninë dhe Suedinë, tha të mërkurën kryeministri i Polonisë, Donald Tusk.

“Një anije ruse nga ‘flota në hije’ e mbuluar nga sanksionet kreu manovra të dyshimta pranë kabllit elektrik që lidh Poloninë me Suedinë”, shkroi Tusk në X.

“Pas ndërhyrjes efektive të ushtrisë sonë, anija lundroi drejt njërit prej porteve ruse.”

Termi “flotë në hije” përdoret për të përshkruar anijet që Rusia operon me mjete të fshehta për të shmangur sanksionet.

Vendet perëndimore thonë se Moska po përdor qindra anije cisterna nën pronësi të errët për të transportuar naftë ruse nëpër botë, pavarësisht sanksioneve perëndimore kundër tyre.