Zbulohet tjetër rast i basteve sportive në Kombinat, arrestohet 24-vjeçari

Vijon në Tiranë operacioni i koduar “Fati i lojërave”, në kuadër të të cilit është zbuluar një tjetër rast i organizimit të kundërligjshëm të basteve sportive.

Gjatë kontrolleve të ushtruara nga specialistët për Hetimin e Krimeve të Komisariatit të Policisë Nr. 6, në zonën e Kombinati, u konstatua një lokal ku viheshin baste sportive përmes celularit.

Në përfundim të veprimeve, u arrestua në flagrancë shtetasi Xh. Xh., 24 vjeç, i cili kishte në përdorim ambientin. Policia bëri të mundur edhe sekuestrimin e celularit, në të cilin u gjetën faqe aktive për vendosjen e basteve sportive.

Autoritetet bëjnë me dije se kontrollet për goditjen e kësaj veprimtarie të paligjshme vijojnë në të gjithë qarkun e Tiranës, ndërsa materialet procedurale i janë referuar Prokurorisë për veprime të mëtejshme.