Zelensky flet për marrëveshjen me Trump: Fillimi i një suksesi të madh

Presidenti i Ukrainës, Volodymyr Zelensky, ka komentuar këtë të mërkurë marrëveshjen për mineralet e rralla që Ukraina ka dakordësuar me SHBA-të.

Zelensky tha se shpreson që një marrëveshje fillestare për mineralet me Shtetet e Bashkuara do të hapë rrugën për marrëveshje të tjera në të ardhmen. Megjithatë, ai ka konfirmuar se ende nuk është arritur një dakordësi për garancitë e sigurisë që SHBA do t’i ofrojë Ukrainës.

Zelensky përmendi një fond në pronësi të përbashkët SHBA-Ukrainë, në të cilin do të kontribuoheshin 50% e të ardhurave nga burimet natyrore të Ukrainës. Megjithatë, ai theksoi se është “shumë herët për të folur në terma konkrete me shifra parash”.

Presidenti ukrainas sqaroi se ekipi i tij i ka kërkuar palës amerikane që marrëveshja të përfshijë garanci sigurie për Ukrainën, por deri më tani nuk është arritur asnjë dakordësi konkrete.

“Doja të kishte një përkufizim të qartë për garancitë e sigurisë për Ukrainën dhe është e rëndësishme që kjo të jetë e përfshirë,” deklaroi ai.

I pyetur nga BBC nëse do të tërhiqej nga marrëveshja nëse Trump nuk ofronte garancitë e sigurisë që Ukraina kërkon, ai u përgjigj:

“Dua të gjej një rrugë drejt NATO-s apo diçka të ngjashme. Nëse nuk marrim garanci sigurie, nuk do të ketë armëpushim, asgjë nuk do të funksionojë.”

Zelensky theksoi se çështja kryesore për të mbetet vazhdimi i ndihmës amerikane për Ukrainën. Ai e përshkroi marrëveshjen për mineralet si “fillimin e një suksesi të madh”.

“Suksesi do të varet nga biseda jonë me Presidentin Trump,” tha ai, duke shtuar se do të këmbëngulë për garancitë e sigurisë për Ukrainën si pjesë e çdo marrëveshjeje dypalëshe që do të firmosë.

LEXONI GJITHASHTU:

• Arma sekrete që BE mund të përdor si mjet presioni ndaj Trump dhe Putin për Ukrainën
• “Burimet natyrore do ndahen me SHBA”- Zbardhet draft-marrëveshja e Trump me Ukrainën