Zelensky në Khersonin e çliruar: Tani jemi gati për paqen

Presidenti ukrainas Volodymyr Zelensky ka vizituar qytetin e Khersonit disa ditë pas çlirimit të tij nga trupat ruse.

Ai foli me ushtarët e pranishëm atje duke u thënë se, “Ukraina po ecën përpara” dhe se ajo është gati për paqe.

Gjithashtu, Zelensky këndoi himnin ukrainas teksa flamuri i vendit u ngrit në ndërtesën kryesore administrative.

“Ukraina është gati për paqe, për paqe në të gjithë vendin tonë”, u tha presidenti trupave, të cilat i falënderoi për punën e tyre.

Ai falënderoi edhe NATO-n dhe aleatët e tjerë për mbështetjen, duke shtuar se sistemet raketore të ofruara nga Shtetet e Bashkuara kishin bërë diferencën në betejë.

Ndërkohë, banorët e qytetit denoncuan shkatërrimin që kishin lënë pas trupat ruse.

“Ata morën gjithçka nga hotelet tona, nga dyqanet tona. Çfarëdo që panë e morën me vete. Edhe nga restorantet që pushtuan morën gjithçka, të gjitha pajisjet”, tha Antonina Vysochenko, banore e Khersonit.

“Ata menduan se do të na mbyllnin këtu dhe se njerëzit do të falënderonin Zotin se erdhën çlirimtarët. Jo! Ata urreheshin nga qytetarët në çdo cep të vendit”, u shpreh Lada Kolosovska, banore e Khersonit.

Humbja e Khersonit, i marrë nën kontroll nga rusët në fazat e para të pushtimit, ishte një humbje e rëndë për Moskën, edhe pse ajo insiston se rajoni mbetet pjesë e territorit rus.

Në një event në Kremlin, presidenti Putin tha se aneksimi i Luhanskut, Donjeckut, Zaporizhias dhe Khersonit është i panegociueshëm.

LEXONI GJITHASHTU:

• Zelensky: Ushtria ruse kreu qindra krime lufte në Kherson, do gjejmë çdo vrasës
• VIDEO| Rusët vodhën kafshë nga kopshti zoologjik para se të iknin nga Kherson