Zelensky: Putini e ka nisur tashmë Luftën e Tretë Botërore, nuk do të heqim dorë nga territoret

Presidenti ukrainas Volodymyr Zelensky ka thënë se vendi i tij nuk do t’i lëshojë territoret Rusisë sipas një marrëveshjeje të mundshme armëpushimi, duke argumentuar se Vladimir Putin “e ka filluar tashmë Luftën e Tretë Botërore”.

Në një intervistë me BBC-në , ai tha se e vetmja përgjigje ishte të ushtrohej presion i fortë ushtarak dhe ekonomik mbi Moskën.

Zelensky e bëri të qartë se ai e hedh poshtë mundësinë e heqjes dorë nga 20% e rajonit të Donetskut, të kontrolluar nga Rusia, si dhe nga territore shtesë në rajonet jugore të Khersonit dhe Zaporizhias.

“Nuk e shoh vetëm si tokë. E shoh si një braktisje, një dobësim të pozicioneve tona, një braktisje të qindra mijëra njerëzve që jetojnë atje. Dhe jam i sigurt se kjo ‘tërheqje’ do ta ndajë shoqërinë tonë”, tha ai.

Ai vlerësoi se edhe nëse një lëshim e kënaqte përkohësisht Putinin, Rusia do ta përdorte armëpushimin si një “pauzë” për të riorganizuar forcat.

“Partnerët tanë evropianë po na thonë se mund të duhen tre deri në pesë vjet. Sipas mendimit tim, mund të rikuperohet brenda dy vjetësh”, tha ai, duke u pyetur “ku do të shkojë më pas?”

Presidenti ukrainas argumentoi se fitorja nuk ka të bëjë vetëm me rivendosjen e normalitetit për ukrainasit, por edhe me parandalimin e një kërcënimi më të gjerë.

“Ndalimi i Putinit sot dhe parandalimi i tij nga pushtimi i Ukrainës është një fitore për të gjithë botën. Putini nuk do të ndalet në Ukrainë”, tha ai.

Lidhur me rivendosjen e plotë të kufijve të vitit 1991, ai theksoi se ishte një qëllim, por pranoi se një përpjekje e menjëhershme për të rimarrë të gjitha territoret e pushtuara do të kishte një kosto të madhe njerëzore. “Çfarë është toka pa njerëz? Asgjë”, tha ai.

I pyetur nëse mund t’i besonte Trumpit, presidenti ukrainas tha se garancitë e sigurisë duhet të institucionalizohen nga Kongresi i SHBA-së për të zgjatur përtej një mandati presidencial.

“Presidentët ndryshojnë, por institucionet mbeten”, vuri në dukje ai.

Në të njëjtën kohë, ai tha se përpara se të shqyrtohet mundësia e mbajtjes së zgjedhjeve, një çështje që është ngritur edhe nga Uashingtoni, së pari duhet të sigurohen garanci të qarta sigurie për vendin.

Zelensky tha se teknikisht zgjedhjet mund të mbaheshin nëse legjislacioni përkatës do të ishte në fuqi, por ai theksoi vështirësitë praktike, duke pasur parasysh se miliona ukrainas janë jashtë vendit dhe pjesë të konsiderueshme të vendit janë nën pushtimin rus.

“Nëse ky është një kusht për t’i dhënë fund luftës, le ta bëjmë. Por ato duhet të bëhen në një mënyrë që njihet si legjitime, para së gjithash nga populli ukrainas”, tha ai.