Zelensky: Raundi i ardhshëm i bisedimeve për paqe do të zhvillohet në fillim të marsit në Abu Dhabi

Presidenti ukrainas Volodymyr Zelensky ka deklaruar se raundi i ardhshëm i bisedimeve trepalëshe të paqes të ndërmjetësuara nga SHBA-të midis Rusisë dhe Ukrainës do të mbahen në Abu Dhabi në fillim të marsit.

Zelensky e bëri deklaratën në fjalimin e tij të përditshëm në mbrëmje pas bisedimeve në Gjenevë midis zyrtarëve amerikanë dhe ukrainas mbi rindërtimin pas luftës.

Presidenti ukrainas, pasi njoftoi se takimi trepalësh midis vendit të tij, Rusisë dhe Shteteve të Bashkuara do të zhvillohet në Emiratet e Bashkuara Arabe, shtoi se diskutimet e zhvilluara sot me amerikanët në Gjenevë kishin bërë përparim.

“Pas takimeve të sotme, përgatitjet për takimin e ardhshëm trepalësh kanë përparuar më tej. Me shumë mundësi, takimi i ardhshëm do të mbahet në Emiratet e Bashkuara Arabe, konkretisht në Abu Dhabi. Ne presim që ky takim të zhvillohet në fillim të marsit”, theksoi ai.

Kreu i negociatorëve ukrainas, Rustem Umerov tha se pas bisedimeve me të dërguarit amerikanë Steve Witkoff dhe Jared Kushner, negociatorët ukrainas u takuan me Zelenskyn për të shqyrtuar rezultatet e takimit dhe për të diskutuar veprimet e tyre të ardhshme.

Sipas Umerov, negociatorët po punojnë për të finalizuar çështjet ekonomike dhe të sigurisë në mënyrë që takimi i ardhshëm trepalësh me SHBA-në dhe Rusinë të jetë sa më i suksesshëm.